Accommodation

130 fermetra hús til leigu á suður Spáni. 

Húsið er staðsett í 800 manna fjallaþorpi þar sem ferðamenn sjást aldrei og enginn talar neitt annað en spænsku. Húsið er nýuppgert og með frábæru útsýni. Í húsinu eru 4 til 5 svefnherbergi, stofa og eldhús með arni og þar er einnig stór verönd.  Húsið er fullbúið öllum helstu þægindum s.s. eins og þvottavél, ísskápur loftkæling á neðri hæðinni og sjónvarp.

Þorpið heitir Castil de Campos og er rétt hjá bæ sem heitir Priego de Cordoba. Þorpið er í klukkutíma keyrslu frá Granada og í klukkutíma keyrslu frá Cordoba. Best er að fljúga til Malaga og keyra þaðan í þorpið en það tekur um það bil einn og hálfan til tvo tíma að keyra frá Costa del Sol og í þorpið.

Það eru nokkrir barir í þorpinu og súpermarkaður en brauðbílinn stoppar á hverjum morgni fyrir framan húsið og selur nýbakað brauð. Svo kemur ávaxtabíll, sætabrauðsbíll, fiskibílinn og kjötbílinn  um það bil einu sinni til tvisvar í viku og stoppar á aðaltorginu. Þarna er mikill verðmunur frá helstu ferðamannastöðunum og það að fara út að borða kostar að minnsta kosti helmingi minna. Fólkið í þorpinu er einstaklega vinarlegt og allir vilja allt fyrir mann gera. Það eru reglulega þorpshátíðir á sumrin og þá safnast íbúarnir saman á götunum með stóla og borð og fær sér að borða og drekka og dansinn dunar við suðræna og seiðandi tónlist í sumarhitanum í Andalúsíu. Þorpsbúar lifa á ólífurækt enda eru ólífutré alls staðar í kring.